Sunday, November 28, 2010

葉幼琪、蔣文端 - 一曲鳳求凰


葉幼琪、蔣文端 - 一曲鳳求凰 (上)


葉幼琪、蔣文端 - 一曲鳳求凰 (中)


葉幼琪、蔣文端 - 一曲鳳求凰 (下)

Monday, November 15, 2010

梁醒波、鳳凰女 - 光棍姻缘


梁醒波、鳳凰女 - 光棍姻缘 (1/2)


丑唱:擔番口大雪茄咋,充生哂認經理噃,撈世界要醒目,一於當玩把戲之嘛,著起西裝,革履,USA 歐西美,我實在無乜聲氣咋噃,時常係靠滾,全憑去棍返嚟,剛啱有隻大鷓鴣,嘩,肥就確係肥,佢今晚仲約咗我去睇大戲。所以我拋磚引玉,好多八寶至度得咋,嗰幾雞啫。希望財色兼收,寧願在劇院門前罰企喺喇。咦咦咦,乜咁耐都未嚟㗎喂?

旦唱:老襯何妨要多㩒,我都好少理,猛拋生藕,係都要揾便宜,近日有隻肥羊,佢話住晌跑馬地喎,佢話佢晌銀行,係自己揸大旗。做光棍都無非為把親娘養活,希望斬到啲老襯鮮血淋漓,多多少少都無相干,總求天天都要發市。

丑白:哈佬,MISS 露絲,乜而家至嚟呀,陰功咯,做乜珊珊來遲呀,你難為我頸都望到長,企到腳都痺喇。

旦白:係咩?哎吔真係對唔住喇陳經理,我都唔想去睇戲啦,不如,你陪我去百貨公司啦。

丑白:呀,去公司係嗎,唔,第日至去啦不如,今日機會難逢,今晚呢齣特別係好戲嚟㗎。

旦白:哎吔你睇吓人地場場都滿座㗎,呀,唔啱我搵阿王仔同我哋買幾條黑市飛啦好嗎?

丑白:好呀,好呀,我度有錢,等我,等我,等我吓。

丑唱:呢度啱啱有八個銀錢,兩張超等都有多餘。

旦唱:咁你企晌處等一陣間啦,我買到就番嚟搵你㗎啦。

丑白:快啲啦吓。

旦白:等我囉噃,等我囉噃吓。

丑白:咦,乜四點㗎啦,係啦,乜咁呀喂?

丑唱:係啦乜佢去如黃鶴,足足罰咗我企幾小時囉噃。敝啦,唔通呢帳光棍遇著無皮柴,唔得,等我週圍去搵吓佢去咗邊一處咋。

丑白:哦,露絲你番嚟啦?

旦白:你叫邊一個呀?邊個識得你呀?

丑白:喂,老虎頭上你敢釘蝨乸係嘛?精嘅你就快啲回水囉噃。

旦白:真係笑話喇,乜回回聲咁大膽呀。

丑唱:哎吔吔你真係膽大包天,居然做鱷魚蝨乸係嘛?呢帳量你插翼都難飛,若果我吹銀雞...

旦白:拉我囉噃?

丑白:駛乜講

丑唱:一經嗌起啲差人,就要將你當堂鎖起,

旦白:我又信呀

丑唱:你係無皮柴,呢趟你當堂撞特喇掛,精你就快啲回番嗰八皮囉噃,

旦白:笑話

丑唱:你對住老行尊,你都夠膽嚟偷雞,同你講多都嫌哂聲壞氣,真正係行行衰運,老鼠食老鼠,點知義氣博到兒嬉,今帳索錯油,誰料你不問良心,將我當堂一谷就驍起,而家拆穿咗你個西洋鏡囉噃,好喇,你就有柴有米囉噃,難為我要抵制嗰個肚皮喇,喂,精你就快啲回番水過嚟,否則我叫人拉你個噃。

旦白:咪住咋

旦唱:卻原來你係冒牌經理,無非打腫塊面學人肥

丑白:仲咁抵死係嘛

旦續唱:我冒充交際花,無非因家境困難,至有幹此欺人把戲,我本是好女兒,只為家貧親老,全賴我棍騙療饑,

丑白:慘啦我

旦續唱:記得甫逢君,見你衣服豪華,惹起我垂涎嚟光顧你㗎咋,估話遇財神,我仲叮嚀密約,向你賣盡生藕橫飛,豈料係同行,(待續)


梁醒波、鳳凰女 - 光棍姻缘 (2/2)


(續)向你賣盡生藕橫飛,豈料係同行,光棍遇著無皮柴,誰知你係個青磚沙梨,現在銀紙都花清,只換得松柴白米咋,怎能合浦還珠,嗱,如果你吊起個沙煲...

丑白:點呀?

旦續唱:你至多跟埋我番屋企,人類貴同情,不忍你捱飢餓,等我救濟你個肚皮。

丑白:喂,係唔係呀?係就好囉!

丑唱:你真係良心不欺,你良心不欺,喂行家真知己,

旦唱:咁我又何必相欺,何必相欺,做行家總要通通氣㗎嘛。

丑唱:係頂啦,撞特真正哂心機

旦唱:喂,棍騙本來係犯法事

丑白:犯法

丑唱:回頭就不幹,結知己

旦唱:大家結相知,

丑唱:莫非你對我有真情義

旦唱:與你共諧鴛侶,要你同我畫眼眉

丑唱:好囉,艷福飛來心歡喜,自心改過當及時,阿露絲呀,我哋一於大家轉行,永遠都唔做呢啲欺人生意。

旦唱:光棍姻缘成美眷

丑唱:我哋一於明年增加生產

旦白:咩叫做增加生產啫?

丑白:哦,乜你咁都唔明白?

旦白:唔明呀

丑唱:我就係想你共我生個 BB 丫嘛。